सांग सख्या रे

सांग सख्या रे हे; 
असे काय व्हावे?
तू दूर तरिही; 
तुझे भास व्हावे! 

जरी दर्पणी ह्या;
मला मी बघावे  
तुझे रुप त्याने;
हाय दाखवावे!
श्वासही माझे;
तुला फितूर व्हावे?
कसे भान नुरले,
मला ना कळावे 
सांग सख्या रे हे; 
असे काय व्हावे?

कळीने जसे त्या,
उमलुन यावे
तसे मी फुलावे,
बहरुन जावे
अशी काय जादु?
असे काय व्हावे?
तीर नाही तरी मी,
घायाळ व्हावे 
सांग सख्या रे हे; 
असे काय व्हावे?

सरींनी स्वरांच्या 
मन चिंब व्हावे
तू सूर अन मी
तुझी वेणु व्हावे
तुझे श्वास, निश्वास
मी ओळखावे
सांग सख्या रे हे; 
असे काय व्हावे?

(अवलच्या कवितेला झब्बू)