कॉफीची फिकी वर्तुळे उमटलेला उन्हाळा
आळशी दुपारी छेडलेल्या गिटारच्या तारा
आणि टेबलावर बर्फ चमकणारा ग्लास

निळ्या खिडकीतून येणारा चोरटा सूर्य
शुभ्र नक्षीदार पडद्यातून फाकत उजळ रेषा
पसरत राहतो खोलीभर मिटवत पापण्या

दरवळतात आपले आवडते सगळे गंध
समुद्र, कॉफी आणि आंब्याचा मोहोर
प्रत्येक श्वासाने वाहणाऱ्या माझ्या धमन्या

आणि एक दिवास्वप्न
शांत, मग्न तळ्याकाठी
थांबून वाट बघणारे..

मग जमण्यासारखी एकच गोष्ट जमते
डोळे उघडे ठेवून बघत रहाते रहदारी
तुझ्या चमकत्या डोळ्यांत बघितल्यासारखी..