आता तुम्ही म्हणाल मला वेड लागलंय, पण मी खरंच प्रेमात पडलेय. तुर्की आवडती माणसं (उफ्फ!), तिथली घरोघरी, रस्तोरस्ती फिरणारी अती माणसाळलेली, गुबगुबीत कुत्रे-मांजरं, आजूबाजूचे फेसाळते निळे पाणी आणि खारा वारा, इस्तंबूलमधली बडबडी, चमकधमक गर्दी ते अंताल्यामधली दूरवर पसरलेली डोंगरापर्यंत मऊ शांतता.
त्यांची पारंपरिक फोक सॉंग्स ते आर्त लव्ह सॉंग्स ते मॉडर्न ब्लूज आणि रॉक, रंगीबेरंगी घरं, अँटिक इमारती आणि गल्लोगल्ली सापडणारे लहानसे प्रेमळ कॅफे, सिटीस्केप्स ते लँडस्केप्स सगळंच प्रेमात पडणारं! इतक्या सगळ्या तुर्की मालिका बघताना अजून एक गोष्ट पुन्हा पुन्हा डोळ्यासमोर येत प्रेमात पाडत होती ती म्हणजे त्यांची खाद्यसंस्कृती!
मग काय गूगल आपल्या हाताशी म्हणत नेहमीसारखी शरलॉकगिरी सुरू केली. जरी स्वतःला स्वयंपाकाचा कंटाळा असला तरी माहिती जमवायला काय हरकत आहे, हो ना?