सध्या मला एक मोठाच प्रश्न सतावीत आहे मला. सर्वच बाबतीत असे नाही पण बऱ्याच बाबतीत मला कोणतीच बाजू ठामपणे घेता येत नाही. सगळ्यांचे सगळे बरोबरच वाटते आणि त्याचबरोबर चुकीचेही वाटते. आता सैफ-करीना ने आपल्या मुलाचे नाव तैमूर ठेवले त्यावरून एवढा गदारोळ माजला. सुरुवातीला मला पण थोडे विचित्र वाटले पण मग मी विचार केला की माझ्या मुलाचे नाव ठेवताना ना मी आई- वडिलांना विचारले ना सासूसासऱ्यांना मग सैफ-करीना ने काय म्हणून जनतेचा विचार घ्यावा (किंवा करावा)??? हेही पटले. पण तरीही तैमूर नाव ठेवायला नकोच होते हे ही पटले.

नियोजित वेळी विमान मुंबईहून निघाले आणि मी हुश्श केलं. खिडकी मिळाली होती. सहज म्हणून बाहेर पाहते तो अहो आश्चर्यम ! चक्क इंद्रधनुष्य !! पावसाचे दिवस नसतांना इतकं सुस्पष्ट इंद्रधनुष्य कसं काय दिसतंय याचंच अप्रुप वाटत होतं. फक्त मुंबईच्या स्कायलाईनवरच नाही तर चक्क चेन्नई येईपर्यंत त्याने साथ केली माझी. खूप छान वाटत होतं. एकमेकांत मिसळलेले तरीही स्वतःचं वेगळं अस्तित्व जपणारे सप्तरंग. बराच वेळ न्याहाळत होते मी ते.